مواقف الاطفال في الاكل خارج المنزل والاحراج شاركونا

السلام عليكم ورحمة الله و بركاته
موضوعي للفرفشة
قصته عن الطعام

اغلب الاطفال يفضحو اهلهم برة البيت ويعملو حالهم محرومين عمرهمش داقو شي مابعرف ليش

مثال

اختي الصغيرة كانت فظيعة بطنها كبير وتحب الاكل كانها محرومة رغم انو عمرنا مانحرمنا من شي

مرة زارونا دار خالي الله يرحمه وجابو كمثرى معاهم عادي يعني

واحنا دايما بنجيب كل انواع الفواكه عادي

والا اختي بتقوللهم
الله كمثرى عمرناش دقنا الكمثرى

!!

كان عمرها مممممم يعني 8 سنين يمكن هيك اكثر اقل شوي يعني

بعدين كانت فظيعة

لانها اخر العنقود ماما تاخدها دايما اي مشوار

وكل منروح مكان

اول منوصل تهمس في اذن ماما(ماما جعانة )
وماما تتلون اشكال الوان وهس واسكتي والناس يلاحظو شو مالها يا فلانة

مالها احكي

يروحو يقولو جعانة ياحبيبيتي تعالي اعملك سندوش ااااخ فضيحة ماما ماشاءالله مستوى اجتماعي و الها مكانتها وهيك بالاخر

بعدين تعودو كل منروح وتهمس في اذن ماما يعرفو انو الجوع دبحها

وصرنا قبل كل مشوار ناكد عليها ونعمللها اكل وسندوش
وفش فايدة

ولما يقدمو الناس اي شي

مكسرات عصير او حلويات

ماتمد ايدها

تصير تتطلع في امي و تتطلع للاكل

كانو خايفة تاكل مع انو والله ماما ماكانت تنبهها ولا شي عادي نروح الناس عادي بس اختي من وين كانت تجيب القصص هاي مش عارفة

وتروح صاحبة المنزل تقول يوه يافلانة اخص عليكي ليش بنتك بتتطلع فيكي منبهة عليها ماتاكل

تعالي ياحبيبتي تعالي اأكلك

!!!

ولما كانت في الابتدائي ويصير في رحلات مدرسية تبذل اقصا جهدها لحتى كلنا نعطيها فلوس وتشتري كم هائل من الشوكلاتات والشبس وهيك امور

وترجع من الرحلة مخبية اغلبهم

ليش مخبياهم يا فلانة

تقلك عشان استمتع فيهم لحالي في الليل

عشان احس في شيء مفرح ينتظرني في البيت

!!!!



ولا اخي لما كان عمرو 2 او 3 سنين

كنا نطلع بالسيارة كنا ايامها عايشين في احدى دول الخليج

وفي اشارة مرورية كل مرة نفس الشرطي واقف وبياكل حمص

واخي يمد ايدو ويسرخ حمصصصصص حمصصصصصصص

والشرطي كان نفسيته تعبانة الظاهر هههه يصير يتسلى على اخي ويمدلو الحمص ويرجع ياخدو ويضحك باستهبال

وصار بابا كل مرة يغير اتجاه السيارة متعمد عشان الفضايح بس اخي تلاقيه لمح الشرطي ويصرخ حمص حمص وصرنا نجبلو حمص فش فايدة لازم الحمص الي في ايد الرجال

وكل مرة المشكلة الشرطي بياكل حمص هههههه


ماشاءالله تبارك الله ياكل كل الي نفسه فيه

بس لما نروح الناس

يوقف عند البسكوت كانو اول مرة يشوفه

ويفتفت ويوسخ الارض ويصير ينشر الفتافيت بايده متعمد

يلف يلف ويرجع يلزق في صحن البسكوت مابعرف ليش

ياكل عدة وحدات ويروح يلعب وماينساه يرجع كانو عمروش اكل

وفي جارتي زرتها وتسلط فهد عالبسكوت وفتحنا سيرة الاطفال والاكل بتقول في عمارتهم القديمة مكان سكنهم الاول
كان في بنت صغيرة 4 سنين تيجي تخبط الباب

وتتسلط عندهم بس تاكل حلويات

وتروح المطبخ تقلهم

خالتو افتحيلي بدي موز احنا ماعنا موز

ماعنا بطيخ

ماعنا اكل
وتصير تبكي

والنكتة جارتي بتقول اهلها صحابهم جدا جدا

طول النهار التلاجة مليانة اروح عندهم يضيفوني كل انواع الفاكهة وازا دخلت المطبخ نتساعد في شي

تنفتح قدامي التلاجة الاقي كل الانواع موجودة

ليش البنت تيجي تقول ماعنا موز ولا بطيخ وتبكي كمان

والله فشلة وفضيحة

شي مخزي رسمي


اموت واعرف ليش هيك بتصرفو بعض الاطفال


والان اترك لكم الحديث سواء عن انفسكم او اطفالكم او معارفكم